Netflix歷史劇《王冠》（The Crown）一直係話題之作，全因佢毫無掩飾、毫不顧忌地將仍然在任嘅英女皇伊利沙伯二世嘅秘密、甚至醜聞都公諸於世。上一季我哋已經見到英女皇同菲臘親王充滿張力嘅關係，而今季仲大膽，大爆菲臘親王疑似出軌往事。

對比起歷史大事，相信觀眾對英女皇嘅私事更有興趣，而私事之中，緋聞甚至係醜聞就最夠「juicy」。今季《王冠》就將英女皇同菲臘親王嘅婚姻問題作重點，菲臘親王因為唔鍾意面對充滿權力嘅老婆，頻頻同公子哥兒好友去玩，但男人聚埋一齊點會唔玩女人？由菲臘親王好友玩女人、到佢自己都有種種「逢場作興」證據被英女皇捉到，令夫婦二人關係決裂，甚至嚴重到嗌離婚。而對照史實，二人確於該段時間婚姻不和，連呢套劇嘅顧問、歷史學家Robert Lacey都指：「呢套劇集係非常準確同真實咁反映歷史。」雖然話兩公婆關埋房門嘅事未必有人知，但呢套戲係請咗8位全職資料搜集員嚟考究歷史，所以事實上菲臘親王有冇出過軌？就要由觀眾去定奪。