講到Yumi之前仲話Avis陳偉成係結婚對象,依家話散就散,會唔會好可惜?Yumi今日到尖沙嘴出席活動時,即話:「我話考慮啫,冇應承。」
Yumi又話依家心情已平伏,因為有心理準備同Avis分手,只係冇諗過一講分手做咁大反擊行為。Yumi又話原本係希望低調分手,且個幾月前已同Avis提出分手,但之後大家好番,不過感情已經冇咁好。到依家終於亦難逃分手命運。
Yumi解釋:「佢(Avis)一二再,再而三騷擾我朋友,鬧我朋友,搞到人哋好困擾,咁係原諒唔到。」係咪有騷擾韓國男仔?Yumi直認:「係呀。」
Yumi話唔會咁快接受新戀情,會睇清楚內涵先,至於擔唔擔心Avis有下一步行動?Yumi竟話:「唔擔心,有咩事會報警。」
同場Naomi話中三已識Avis,識咗佢十幾年,初初都以為佢哋耍花槍,不過Avis真係超級識冧女,自己都幫過佢追女仔,之前Avis有唔愉快事,自己都力撐佢,不過依家可能改觀。講到Yumi話再騷擾佢會報警,會唔會單聲Avis知?Naomi即話:「會呀,我諗佢未癲到咁。」