現年31歲嘅美國女歌手Ke$ha（Kesha Sebert）原定今晚喺台大體育館舉行個唱，但佢竟然喺開騷前20分鐘臨時取消，消息指Ke$ha係「水土不服送醫」，然而，主辦機構邦艾波醍娛樂有限公司仍未喺現場或網上宣佈取消消息，所以入場歌迷都無所適從。

據台灣《蘋果》報道，Ke$ha呢個演唱會可謂一波三折，佢原定喺4月8日首度登台，假台北南港C3停車場演出，點知喺訪台前，於2月喺杜拜表演時不慎墮台，造成前十字靭帶膝關節損傷，宣佈之後嘅個唱，包括台灣場次全部延期。

後來有傳原先接洽嘅主辦單位倒閉，原定於9月16號改到南港展覽館開騷嘅Ke$ha，去到上個月又改地點，變為台大體育館。

其實Ke$ha噚晚抵台過程都唔係好順利，原本講好咗佢抵台後俾傳媒影相，但隨行工作人員出手擋鏡頭，被直指出爾反爾。估唔到Ke$ha方面更玩到喺開騷前臨門一腳取消，玩謝樂迷。而佢個騷嘅退票方法，將於後日（18日）中午12點前喺fans專頁宣佈。

精選娛聞，喺晒《娛果》
http://fb.com/appledailyent