「第三屆澳門國際影展暨頒獎典禮」今日喺澳門舉行，繼續有明星大使出席記者會，晏晝就到韓國少女時代嘅允兒亮相，不過招待上同尼古拉斯基治(Nicolas Cage)相比差一大截，首先記者會遲足成個鐘，其次就係場地竟然冇任何咪同擴音器材。Nicolas嘅場地有提供即時翻譯團隊，但允兒同翻譯喺記招上，只係可以用自己把聲同攝影師嘅相機快門聲鬥大鬥響，簡直係聽力大考驗！

講番記者會內容，允兒首先大讚澳門夜景靚，希望下次放假時可以周圍遊覽，今次擔任「明星大使」嘅佢，話最期待欣賞到張藝謀嘅《影》，同時韓國電影《懺悔》亦有份入圍，允兒話希望《懺》片同樣有好成績。

允兒又透露o依家正拍攝災難片《EXIT》，佢話：「唔係想像中嘅動作電影，冇打鬥場面，主要係奔跑逃命情節，我嘅角色形象係大家從未見過，好期待電影在下年可以同大家見面，希望能參與下屆影展。」

近年接拍國內劇集又上綜藝節目嘅允兒話，正努力學國語：「希望將來可參與更多華語片，演繹更多華語對白。」講到香港電影，佢話有睇王家衛執導嘅作品，希望日後有機會合作。

精選娛聞，喺晒《娛果》
http://fb.com/appledailyent