【李八方online】葉劉嘆富豪賣樓求去對港失信心遭田少寸爆：講到好似同自己無關咁！
蘋果日報 2020/09/15 19:14
葉劉淑儀田北俊豪宅
有時，架可能真係自己丟㗎。身兼行政會議成員嘅新民黨主席葉劉淑儀噚日（14日）喺Facebook發帖，話喺港島寶雲道行山時，沿途見到唔少燈柱、欄杆同埋涼亭，都貼滿豪宅盤廣告，部份講明係「割價」、「急售」，佢即時專家上身，話反映香港已出現令人憂心嘅社會現象、有人對香港缺乏信心甚至徹底死心、對香港明顯響起「信心危機」警號，話特區政府要想方法並有實際行動，令香港市民同自世界各地嘅人士，對香港重拾信心及希望。
同樣做過行會成員、持續積極高度關注葉劉一舉一動嘅自由黨榮譽主席田北俊睇唔過眼，即時分享葉劉帖文，反問乜佢冇責任咩：「（葉劉）仲問點解香港搞成咁嘅？啲行政會議議員講到好似同自己冇關係咁樣。」
唔少網民和應田少，批評係政府智囊嘅葉劉推卸責任：「你（葉劉）真係好西（犀）利喎 好似講到唔關你事咁」、「咁你都可以抽到水」。不過有網民突破盲點，話葉劉少見多怪，笑葉劉「你真係行得山少」。
葉劉在Facebook上載一幅燈柱貼滿豪宅放盤廣告的相片。葉劉淑儀Facebook
葉劉專家上身，指從行山徑驚現大量豪宅放盤廣告，反映出香港已出現令人憂心的社會現象，指不少身家豐厚的人，因生意或投資失利，選擇變賣資產離場。葉劉淑儀Facebook
自由黨榮譽主席田北俊轉貼葉劉貼文，並直線抽擊「（葉劉）仲問點解香港搞成咁嘅？啲行政會議議員講到好似同自己冇關係咁樣。」田北俊facebook圖片
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！