應昌佑（Charles)於2012年11月同拍拖九年嘅女友Mandy結婚，一年多後就榮升做老竇，生咗囝囝應嘉軒。

早前透露老婆再陀B，預產期喺六月，應昌佑今日宣佈再做老竇，老婆凌晨4點幾左右，順產生咗囡囡，母女平安。Charles今日接受《蘋果》訪問話：「今日凌晨四點幾生咗，噚晚十一點催生，因為本身已到預產期，估唔到幾個鐘就生咗，重6磅1。（有冇剪臍帶？）有呀，醫生問我剪唔剪，我話剪，因為上次都有剪，唔會偏心。」

佢又話囝囝返咗學未見到妹妹，但為免佢呷醋，之前做好準備，「人哋教佢買定禮物俾哥哥話係妹妹送，做咗都冇壞吖，所以我早已買咗玩具送俾佢，話係妹妹送，佢都好開心。」問Charles會唔會再追多個？佢即笑住話：「夠皮喇！一仔一女都係我同老婆想要嘅，好幸運，好多人想追都冇，可能係兩個仔或者兩個女。」

Charles仲話囡囡早已改咗英文名叫Alison，但中文名就留俾佢阿媽，即係嫲嫲負責改名。

想隨時獲得更多親子資訊，快啲like Easy PaMa Facebook啦！
https://goo.gl/1qWM8g