當年今日
關於我們

國家盃通街正路賽果
球驗客手記:馬會熱門過3關有肉食

蘋果日報 2003/09/08 00:00


馬會足智彩又一次成為熱門球隊天下,前晚佢哋首次為歐洲國家盃外圍賽呢啲國際賽事開盤,結果好幾支分頭熱到飛起嘅球隊,都順利贏波!
前晚除咗德國之外,其他大眾熱門,好似英格蘭、荷蘭、法國、意大利等,全部順利贏波!梗係啦,嚟到𠵱家外圍賽尾聲,各支球隊都要為出線博盡。比起上一輪國際友誼賽,呢次戰果自然係正路啲。
咪睇啲分頭咁熱就以為唔好玩,捉到三W過晒關都有兩倍多,好過博大細,難為馬會又一次要賠通街囉!
計我求大俠話,馬會如果識得開埋亞洲盤,起碼荷蘭及英格蘭兩個上盤都唔使輸先,係咪?

法國8次贏5球或以上
前晚足智彩連波膽都不乏熱門,好似法國大勝塞浦路斯五比○,喺馬會即係買中「主其他」就有錢收,不過竟然得三倍,都算係我求大俠所見波膽派彩最少一次!而法國淨贏對手五球或以上呢個比數,亦已經係○一年三月主場對日本後,第八次出現嘞,認真厲害。
戴維斯辛頓踢正選都唔爭氣
荷蘭對奧地利嗰場,我求大俠就好欣賞「橙軍」正選十一人,依足傳統着晒一至十一號波衫咁工整。其中十一號嘅戴維斯,以及五號嘅辛頓,兩人最近都喺球會冇正選踢,點知呢場佢哋都唔太爭氣,踢咗半場冇表現即被換走,真係想唔認「時不與我」都唔得嘞!

烏克蘭畀舒夫真高累死
烏克蘭主場被北愛爾蘭迫和○比○,都可算係最令人意外戰果嘞。其實賽前烏克蘭被捧到只有一點一八倍,同荷蘭主場贏奧地利賠率差唔多,我求大俠都覺得有少少睇得佢哋太高。結果球迷最期待嘅舒夫真高,今仗埋門操練受傷,累到烏軍𠵱家失分可能出唔到線!

史高斯籌錢幫奧咸解財困
因傷冇份幫英格蘭踢歐洲國家盃外圍賽嘅曼聯中場史高斯,最近就向外表明係正面臨財政困擾嘅奧咸嘅球迷,重會成為佢哋球迷會嘅贊助人,幫手籌錢度過難關。我求大俠就未聽過史高斯同奧咸有乜轇轕嘞,但睇佢態度,應該都係出於一片對國內足球嘅熱心,值得一讚。