吳若希(Jinny)、陳凱琳、黃翠如，JW、關楚耀、吳浩康等，噚晚喺屯門出席酒店開幕活動，Jinny着露肩裝現身，佢開心話條裙係陀B前買，估唔到生完之後條裙仲鬆咗。問係咪湊B辛苦？佢就話：「湊B唔辛苦，老公冇嫌我過瘦，不過就問我係咪營養不良，叫我食藥補下，但我o依家要努力搵錢，陀B時推咗好多廣告。但冇得平衡，BB最緊要，用錢換唔到番嚟，所以o依家要賺多啲。」

之前佢喺一個訪問入面，講過曾經想唔要個BB(新聞連結： http://bit.ly/2B5Q1nG )，再講到呢件事，Jinny坦白話：「當時同老公嗌交，分開咗，知道有BB之後，佢就呆一呆，嗰時係自己事業高峰期，有諗過BB會唔會犧牲自己事業啦！但好快就已經斬斷呢個諗法，小朋友係冇得比，係最甜蜜嘅負擔。」有冇再同老公嗌交？佢笑話：「o依家佢畀我鬧，我脾氣差啲，佢好就得我，不過大家已經搵到啱嘅相處方式。」

至於同場嘅黃翠如一樣着住露肩裝出席開幕活動，講到《Do姐再shopping》，佢成日俾農夫蝦，翠如反而開心笑住話：「現實生活中相處都係一樣，好開心節目收視好，我哋打算一齊食飯慶功。」不過農夫喺節目中抽水笑佢同男友蕭正楠，翠如同樣笑話：「靚抽呀，抽得好好，佢哋好叻靚抽，有啲押韻，喺其他人口中講出嚟冇咁好笑，但C君玩就老土得嚟又潮。」點解唔反擊？翠如直言：「反一下抽多一次，會體無完膚，其實節目令我同農夫好熟，Do姐亦都好錫我，所以我係賺咗嘅。」

佢仲話之前已經諗想讀書進修，樣樣想讀：「只要中間唔使拍劇，細妹o依家用緊銅版畫畫，好想跟佢學，之前讀書有諗過讀Fine Art，不過細妹都想讀，屋企有兩個女讀藝術好大件事，我兩個細妹都係藝術家，好彩我畀到家用。」

更多娛聞，喺晒《娛果》
http://fb.com/appledailyent