現年28歲的郭永健高考2A2B，畢業於香港大學經濟與金融學系，2008年任港大學生會會長，亮麗的履歷本應不愁筍工，高材生最終卻選擇從政，加入工黨為藍領發聲，身為秘書長的他上月在大埔新富選區補選中擊敗兩名建制派候選人，捧走雖然只餘半年任期的區議員議席，為工黨帶來「零的突破」，成為該黨首位區議員。
雖是雨傘運動後首個泛民勝出區選補選，郭永健受訪時坦言，在幅員較小的區選，單靠「日哦夜哦」普選再普選，不是致勝關鍵，始終市民期望區議員解決社區問題：「如果以為宣傳雨傘運動、純粹講普選，咁就諗住可以贏得到，可能性好低……選民已經知道你係建制定泛民，再去講係冇意思」。
他自己也沒有高估傘運的影響力：「本來希望雨傘運動後，喺立法會區議會選舉投票嘅人，都喺（呢次）區議會選舉投票，但呢個情況今次冇出現」。但他強調，這不代表泛民候選人不談民主，稱泛民應在解決地區問題上表現出民主的價值，更重要是讓人看到與建制派之別，「個個人都會話自己解決問題，但問題放喺你面前，究竟可唔可以同人講到問題嘅癥結、成因同困難喺邊呢？唔係純粹拍心口話已經解決乜乜乜問題，或者成功爭取乜乜乜，背後嘅嘢你要坦白同街坊去講」。