【孻女孻心肝】鄺文珣囡囡慶祝1歲生日 錫到成面都係口水
白雪公主鄺文珣CasperCadence應德榮Chesney
【新增回應】
鄺文珣06年與商人應德榮結婚後,先後生咗兩個囝囝,大仔Cadence已10歲幾,二仔Casper都8歲。鄺文珣本來兩個晒數,但舊年發現又有咗,追女成功,全家都好開心。
話咁快又一年,本周二「追月」仲係Chesney嘅1歲生日,呢個大日子,當然一家五口溫馨度過。
Chesney眼仔碌碌,五官精緻,完全倒模自靚媽咪,由於佢係家中孻女,當然孻心肝,唔止係爹哋小情人,兩位哥哥都錫到妹妹燶。鄺文珣特別為壽星女Chesney搞生日會,除親力親為佈置,又訂大蛋糕,仲同Chesney扮靚靚,變身小公主,加上Chesney頭髮濃密,齊蔭頭更加可愛。兩位哥哥都爭相要給妹妹birthday kiss,結果係咁錫唔停,妹妹成面濕晒,成為生日會上一個趣事。
鄺文珣呢排接拍咗台劇,分雖然有點忙,但都為囡囡搞生日會,佢今日接受《蘋果》訪問時話:「本來唔想搞,我又開劇,唔知生日會畀囡囡,定囝囝歲數,佢哋分隔太遠,囡囡得1歲,佢朋友唔係太多,如果搞畀大人,就冇乜意思。」鄺文珣最後考慮咗三方面因素,佢邀請咗教會朋友一齊嚟玩,大家都幫手準備。
Chesney轉眼便1歲,鄺文珣話:「時間過得好快,有小朋友係唔同啲,睇到佢哋由乜都唔識,唔識飲奶,到依家識beautiful eyes電你,照顧小朋友過程係好攰,但開心,所以我都瘦得快,湊住三個呀。小朋友係上天畀嘅禮物,有祝福意思,令家庭更加好,哥哥學咗更多自理,仲幫埋妹妹換片,責任感大咗。我都睇咗兩個哥哥成長好多,佢哋好錫妹妹呀,有時話小息都掛住妹妹,不過有時返到屋企,又唔係立即同妹妹玩。妹妹依家學行,認知能力多咗,活躍咗,要扶住嘢行,佢又鍾意人抱住周圍行,有時哥哥會嫌妹妹好麻煩。」Chesney始終係家中最細,最得人心,兩位哥哥有時啜爆妹妹,錫到佢成頭油
精選娛聞,喺晒《娛果》
http://fb.com/appledailyent