油價急升，即使全世界都知油價升跌由炒家控制晒，一兩個消息都可以令油價失控上升，都冇辦法，美國話加強監管期油炒賣活動，似乎作用唔大。油價上升，理論上油股係目前淡市中唯一值得投資嘅股票類別，可惜在港上市幾隻油股當中，中石油（857）及中石化（386）慘被煉油業務拖累，油價升反而不利。
惟獨中海油（883）係最純正上游石油股，可惜又被暴利稅所困擾，以其股價對比油價升速，現價幾乎未反映過油價升勢。中海油去年全年股東應佔純利約312億元人民幣（下同），而07年全年所繳交的特別收益金（又稱暴利稅）達68億元，可見利潤受暴利稅影響唔細。

中海油現價偏低

不過真正受打擊者其實係中石油，有報道指，中石油母公司中國石油集團於今年首5個月要繳交387億元暴利稅，而稅前利潤只有475億元，可見暴利稅絕對是苛徵的稅項。事實上，現在國際油價已升上140美元以上，暴利稅起徵點卻低至40美元的陳年低水平，究竟何謂暴利，真的要問問發改委官員。
中央政府近期頻頻出招救市，與其干預市場正常發展，倒不如廢除那些不合時宜的企業稅制，救得一隻中石油，起碼對大量中石油「蟹民」算有個交代。由於中央政府才剛大幅調高成品油價，短期再加機會唔大，要救石油企業唯一方法係調低暴利稅，或提高起徵點。
中海油現價偏低，但升唔升得起始終要睇政府政策。