特區政府最快下個月中至月底推出政改方案，喺泛民中人個個「歃血為盟」誓死要箍住啲票唔好走之時，似乎特區政府喺人大常委八．三一框架下推乜嘢方案，都一定被否決。但世事最離奇嘅往往係，當外界覺得政改邊有過關機會之時，建制派內卻越來越多人覺得政改過到關，就此賭一餐飯嘅情況成為風潮。
唔知係咪京城真係有啲真正嘅「權威消息」放料呢？花生友發現，唔少留港嘅泛民中人以至建制派，都覺得政改之路行盡嘞、過關機會好淡，但係喺北京開完兩會嘅港區人大或全國政協，卻完全唔係咁睇噃，普遍人竟然都係覺得最後柳暗花明，泛民會喺最後關頭有票「走」，但又強調情況唔再好似二○一○年傾政改時，中央最後關頭急轉彎。

一味話有信心

咁到底有乜把炮令泛民「回心轉意」先？可能涉及國家機密，所以冇人肯透露，但相信呢啲消息非一般，事關花生友發現，建制派近期圍埋食飯，紛紛就政改通過與否開盤賭一餐晚飯，其中有個玩法，就係喺一個信封入晒大家嘅名以及買支持定否決，據聞曾經北上兩會嘅人，幾乎一面倒買支持，外界認定嘅被否決，反而冇乜人落注。
有個已經退隱江湖嘅前政界中人都同花生友講，最近同啲政界朋友敍舊食飯，其間當然離不開政改，興之所致都有開盤落注，竟然都係買通過嘅佔多，令佢莫名其妙，事關就咁睇牌面個局，泛民似乎都冇落台階啦。
佢有問過呢班朋友，點解有此高見？個個都說不出所以然，一味話有信心，而佢好鬼醒，話𠵱家個局好難睇，兩邊都冇買到，笑笑口話即係邊一邊贏咗，佢都唔會係輸家，一定有餐免費飯食。

花生友