當年今日

國寶虛榮 - 左丁山

蘋果日報 2004/05/19 00:00


旺角豉油街居然發現晉朝古物,實在係阿奇生阿奇。左丁山喺旺角長大,在豉油街留下不少腳毛,豉油街、山東街、通菜街附近,越嚟越旺,人頭多到針插不入,幾十年來都唔知經歷過幾多次修渠築路,掘完又掘幾百次,啲文物埋在地下唔算深嘅地方,咁都未掘爛或者老早被發現?除咗話冥冥中有神靈保佑之外,想唔通。
旺角嘅文物,大概唔算值錢,一件甚麼三千年前(周朝)青銅鳳先至巴閉,由北京保利集團在港購得,價錢唔知,估價達八千萬港紙咁高。保利專門保護國家級文物,不惜大灑金錢,愛國派自然大拍手掌。
掌相名師前一排同左丁山食飯,贈言幾句之餘,講到文物國寶,教左丁山唔好過份重視文物價值。佢話:「所謂文物,乃古代工匠嘅製成品,如果今天有一位巧手工匠做一件同樣物品,可能唔值錢。將佢埋藏在山頂名宅花園,或者康樂園地底,幾百年後挖番出嚟,就會值錢,一千年後重更加值錢!一件千年古物可以令我哋增加對一千年前工藝嘅了解,但除此之外,重有乜價值。一個國家嘅最大價值係人才儲備,真正國寶就係素質高嘅人民同埋長治久安嘅制度——即係民主、自由、法治。美國有乜文物國寶?但佢嘅制度吸引咗全世界最叻嘅人才雲集紐約、矽谷,幫美國製造財富,我哋國家領導人啲子孫都恨過去學習。中國與其花咁多錢送畀外國人,買番啲所謂國寶,倒不如用啲錢嚟辦好中國嘅小學教育。國寶喎,拆穿咗就係虛榮與面子。」