舊年年中傳出中風入院嘅寶蓮寺住持釋智慧大和尚，經過接近成年嘅休養後，噚日亮相主持浴佛慶典。睇落大師已經康復得唔錯，佢大病期間醫護人員同佢講，起碼要五個月之後先講得番嘢，要行番路仲要一年。大師認為佢咁快好番晒，全靠佛力庇佑，同佢患病期間成日念觀世音菩薩救苦救難都有關。

收晒火冇鬧政府

釋智慧大病過後講嘢唔係太清楚，有時個腦諗嗰樣但把口講唔出，但大師風趣依然，話雖然經濟轉差唔多唔少影響善信嘅捐獻，但籌備多年嘅萬佛寶殿一定會喺2011年落成，仲打趣話唔夠錢最多咪起得唔靚，最緊要係起得成。
大師又話，同劉皇發發叔係幾十年老友，最近請咗佢個測量師女婿余漢坤做萬佛寶殿上蓋工程顧問，工程家仲喺招標階段，余漢坤間公司亦有份投標。大師講到明，極之希望對方中標，投標結果下月公佈。
大病過後大師亦收晒火，噚日冇乜點鬧政府，但就重申昂坪360同市集搶咗寶蓮寺唔少生意，對寺方影響都幾大，仲話如果冇寶蓮寺同大佛，又點會有昂坪360吊車呢？希望政府關照吓寺方感受咁話。