政壇高人李鵬飛有個習慣，年年都會拉埋李柱銘同林行止夫婦一齊外遊四圍玩，名副其實退而不休。最近飛哥再度聯同馬丁與林行止三劍俠出動，旅遊點竟然係冷門到極、位於烏克蘭基輔市嘅切爾諾貝爾博物館。

獲邀紀念冊留言

日本一場世紀海嘯引發嘅核災難，確實喚醒好多人對核問題嘅反思，要數最嚴重嘅核輻射事故，非25年前切爾諾貝爾莫屬，當時一下子奪去咗九千幾條人命o架，難怪飛哥同馬丁等人對呢件歷史事件咁上心。八方聽聞呢個博物館係用非常現代化嘅手法展示傷痛歷史，睇過嘅人都大讚獲益良多。飛哥喺旅程完結後仲興致勃勃，興奮向外大講旅遊經歷，唔使問都知此行幾好玩。
原來三劍俠喺博物館內仲有奇遇。飛哥透露，博物館嘅職員見到佢哋都大為詫異，話記憶所及從來未有香港人組團嚟參觀，所以即刻盛意拳拳咁邀請佢哋喺博物館嘅紀念冊留言，引證曾經有一群香港人都到此一遊。