殺得性起的蔡約翰眨吓眼又贏馬，佢於第七場二班田草1400米香港大學校友會挑戰盃，同頭號戰友莫雷拉夾手夾腳幫「爭分奪秒」建功，令其成為今午（11日）沙田繼第四場「特獎」及第六場「駿明珍寶」後，第三匹季內四捷馬。「爭分奪秒」今場大熱掄元，單Win及組合獨贏A1分別派17及11元。

三歲靚馬「爭分奪秒」沿途在外叠前置蝕位，結果仍以1.25馬位之先輕鬆衝贏對手，此駒季內才出道，連同今仗八戰四冠三亞一季，已被譽為下季四歲馬經典一哩賽主角，雷神一直騎住冇放過手，亦證明此駒仲有進步空間。其馬主鍾韙㻺過去以個人名義養過「智來勁」及「矚目」都冇贏過，今季引入「爭分奪秒」卻大幅轉運。

講番蔡約翰，今日已勝出「駿明珍寶」（潘頓）及「爭分奪秒」（雷神），季內已有89場頭馬，差兩場便平到告東尼過去一季91Win紀錄。而雷神加埋第三場贏鄭俊偉馬房「劍飛聲」，亦告起孖領先騎師王。

賽前一日開始受注時，第七場大熱門係轉投方嘉柏馬房初出的「赤兔寶駒」，當時一度熱到獨贏1.0倍，這天開跑時則以「爭分奪秒」1.7倍最熱，「赤兔寶駒」為3.3倍次熱。

結果「爭分奪秒」直路早着先鞭之下輕易勝出，莫雷拉贏馬後遙望遠方看台之愛妻，和太太及一對子女隔空打招呼，互相呼應，十分興奮。而「赤兔寶駒」從外叠後追一直側住個頭好唔規矩，潘頓未能全力施為，人馬首度合作只得第二，3.2倍大熱Q則順利開出，三、四名順序是「奮鬥雄心」及「歷險家」，四重彩派2,403元，暫時全日最奀。