王祖藍離開無綫自立門戶後，講嘢都大膽咗，完全唔怕方丈小器。最近佢拍咗條《老表，畢業喇》嘅惡搞宣傳片，裡面明抄《使徒行者2》嘅宣傳片，由蔡芯(祖藍角色)扮三哥自白，講明《老表》製作好流，真係得香港先搵到。

祖藍話：「我哋都係喺電視城同一般廠景一樣，搭咗幾十個不同設計嘅課室同房，咁流嘅課室同屋企嘅景，應該都真係(除咗)香港，仲有邊度會搵到呢？真係《老表，畢業喇》先有。」據聞《使徒》有大陸大水喉射住，製作費高達五千萬港元，三哥喺宣傳片中透露大隊專誠去泰國同深圳實景拍攝，仲有一場喺深圳荒廢工廠取景嘅爆炸場面，連三哥見慣大場面都話有壓力。

而《老表》就真係輸幾十條街，主要喺秀茂坪、大埔同將軍澳電視城搭廠景，「蔡芯」話：「務求要畀觀眾睇到一拳想打爆電視機嗰種感覺。演員方面，除咗我之外，仲有蔡少芬，Bob，欣宜、欣彤、細細粒、BabyJohn，即係我啲親生仔同我啲朋友我先用㗎咋。」

祖藍今日以短訊回覆傳媒，唔認對無綫冇面俾，佢話：「當初見到《使徒》啲宣傳咁勁，好羨慕呀，咁惟有自己話搞番《老表》嘅宣傳彌補吓心靈咁咯。(《老表》點樣發力追？)冇辦法架喇，追唔到0架喇，咁大嘅製作，我哋啲《老表》小本經營，佢就好似一間連鎖店咁，我哋就係家族生意，冇得追㗎，惟有用心意同埋暖意贏啦係嘛？！」