政府總部同立法會搬咗去金鐘添馬艦之後，附近食肆做多唔少生意，尤其係最近政總嘅中信大廈入面嘅餐廳，平日晏晝日日爆滿；最矜貴嗰間海都酒家，就成為狼班子、議員同政界嘅宴客「飯堂」。最近卻有傳海都「大細超」，啲房永遠畀狼班子優先享有，唔少政界人士憤而杯葛，揚言罷食海都咁話！
八方聽聞，特首辦主任邱騰華係狼班子內嘅海都第一大戶，幾乎有間長房請傳媒同政界食飯吹水，就算係三、四個人，都book大房，好架勢；發展局局長陳茂波等高官亦不時開房請人食飯；行會成員就好多時喺海都開房聚首傾公事。

唔知係咪因為成日有梁班子book房，令海都員工以為嗰度係狼班子嘅飯堂。有政界中人同八方講，早前有一知名政界猛人嘅秘書，打去海都book房，點知海都職員竟然話，訂房冇問題，但如果同日政府要房食飯，就要讓畀官府。
該政界猛人獲秘書告知，官府有「優先權」用海都啲房，即時扯火，隨即打去海都取消booking，橫掂價錢又唔係特別平，食物又唔係特別好。據聞呢個杯葛行動獲唔少政界同議員響應，唔少人寧願轉場去樓下間四合軒「包房」。八方問過海都，職員話包一間12人房，最低消費6至7千蚊，酒樓有成6、7間房，一般嚟講訂咗就有房；唔通嗰位政界猛人嘅遭遇，只係個別畸士？

mailto:[email protected]

齊心一意，打救行騙長官梁振英 http://www.tomonews.net/game/bslapcy/web/