當年今日
關於我們

車仔蠢唔晒 蘇蘭基反價到1億

蘋果日報 2017/06/15 00:45

車路士利物浦歐聯世青盃足球蘇蘭基17/18球季

英格蘭U20拎到今年世青盃,最開心除咗班職球員外,可能就係利物浦;事關紅軍未開波前,已經簽入車路士中場蘇蘭基,蘇蘭基仲拎埋世青盃金球獎,未加盟已經升晒值。不過車路士都唔想白白蝕俾紅軍,臨時提高培育費至1000萬鎊(約1億港元),起碼都叫賺番一筆。
雖然蘇蘭基已經同利物浦簽入自由身加盟協議,不過因為佢只得19歲;根據國際足協規定,未滿24歲球員自由轉會,新球會要支持一筆培育費俾青訓球會。原本紅軍預咗俾300萬鎊(約3千萬港元),但今時唔同往日,蘇蘭基做咗未來潛質新星,車仔就當然反價,要求培育費去到1000萬鎊(約1億港元)。不過咁,之前世青盃金球獎得主有美斯、阿古路、保羅普巴等,利物浦1億都抵俾啦。
如果紅軍唔滿意車仔反價,雙方就可以交俾國際足協仲裁;史杜列治2009年由曼城轉投車路士,就要國際足協仲裁先決定最終培育費,車仔起初預期俾650萬鎊(約6500萬港元),最後要加到850萬鎊(約8500萬港元)。
empty
司職進攻中場嘅蘇蘭基(圖),效力車仔期間上陣機會唔多。