陳豪今日到尖沙嘴出席開幕活動，談到因為反《逃犯條例》修訂，職工盟提議下周一（17日）罷工、罷市、罷課，問他身為家長有何看法？陳豪說：「我哋先唔好講政治住，自己身為父母，睇到咁多年輕人去上街，覺得好痛心，可恨香港今日去到咁嘅地步。」

他表示平日教育子女思想要健康，無論讀書還是做任何事，一定要對得起天地良心：「我都等佢哋長大，希望同佢哋係心靈上多啲溝通，唔係每件事都咁黑白分明，最緊要個人心地好。」

後來，問他會否留下手錶將來送給子女？陳豪笑說：「做老竇咩都留畀佢哋啦，只係睇下點分配。囡囡貪靚啲，最近佢喺YouTube睇到化妝片，直情雙眼發光，女仔貪靚先會靚嘅。」

記者笑指他是否開始擔心囡囡識男仔，陳豪即滿有信心說：「我對佢幾有信心，佢係小霸王、小老虎，應該食得住啲男仔。佢細細個就好bossy，成日指揮我哋做嘢，有時兩個哥哥唔睬佢，佢又冇嘢，好獨立。」提到寶貝女即甜絲絲，陳豪說：「佢最細，都會對佢寵愛少少，不過我個個都錫，個個都叻。」

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】繼續撐蘋果
請往蘋果日報網站了解更多