當年今日
關於我們

隔牆有耳:阿牛風球中攞彩 - 李八方

蘋果日報 2008/08/22 00:00


標榜有平嘢賣嘅電腦通訊節聲言風雨不改,點知九號波殺到就拉閘,一心掃平貨嘅市民嬲到震,衝擊會展,有人報料兩個候選人阿牛同莫乃光都喺現場,唔通佢哋又係苦主?阿牛話佢並非掃貨不成電車男,只係有人急call佢到場幫手,佢指主辦單位安排不周,應該向市民道歉賠償,否則大家一於企硬唔走。
死守唔走隨時引發鐵腕清場,莫乃光可能唔想歷史重演,到場後好言相勸,希望大家早點歸去,不過群情洶湧,而且越來越勞氣,莫乃光都無符,擾攘半個下晝,主辦單位答應送coupon賠償,終平息眾怒,估唔到阿牛喺九號風球中都攞到彩。