26歲嘅青年新政游蕙禎被DQ後仍然有官司在身，亦被立法會追討薪津，但仍有參與公民社會嘅運動，之前接受《蘋果》訪問時亦透露有穩定工作，叫大家唔使擔心。一向少提感情事嘅佢喺噚日兒童節，就同一男子過節。
八方同事噚日下午3點半見到着住紅色短褲仔嘅游BB，身穿背心仔加背心外套去大坑嘆下午茶，同行仲有疑似男友」。游BB面珠圓圓，身形冇乜點變。

游︰私事唔回應

兩人先去茶餐廳醫肚，對話「粗」中帶幼，相當率性。醫完肚就漫步大坑道，之後喺後巷傾密偈，男方仲拎咗支電子煙出嚟增加氣氛。之前有過食煙相流出嘅游BB冇食煙，只係吸男伴嘅二手煙，仲枕落對方膊頭，又畀佢睇自己部手機。
面對連串攻勢，男方終於失守，輕吻女方額頭，輕輕攬腰，但呢個親熱少少嘅舉動只係維持到一支煙嘅時間，食完煙，佢哋又變番唔熟，之後去到一間比較開揚嘅cafe坐，游BB幫對方影吓相，半粒鐘後兩人又沿浣紗街行番出路口，分別時男方明顯唔捨得，攬住游BB條腰，咬耳仔成分鐘，之後向左走向右走。
八方問過游BB，同行係咪佢男友？佢話私事唔回應，希望大家監察多啲港珠澳大橋、高鐵甩轆同戴耀廷受批鬥嘅事件喎。


李八方