【雲端艷照風波之感同身受】荷李活女星裸照風波轟動全球，當年「陳冠希閃卡」受害女星之一的鍾欣潼（阿嬌），昨日着性感tube dress現身澳門奧林匹克體育中心出席「澳門國慶匯演」記者會，身為過來人的阿嬌感同身受嚴肅地說：「我覺得呢樣係好私人嘅事，其實都唔係佢哋自願想公開俾人睇，偷睇咗仲反而鬧人哋，咁唔係咁啱囉。」
阿嬌強調已很久沒用電腦，沒睇荷李活受害女星的相：「有冇美感都唔應該睇。」阿嬌指自己的相片沒甚麼特別，即是有用iCloud？她說：「好方便，佢會自己傳上去。」惟裸照風波疑是iCloud有漏洞，令黑客成功入侵，問會否仍用iCloud？阿嬌說：「有關方面都話調整緊，應該冇乜嘢，其實放上去都係同朋友相、風景嗰啲囉。」
同場的容祖兒、鍾舒漫、泳兒等亦戥受害女星慘，祖兒說：「有啲相係幾靚，影時冇諗住公開，影啲相小心啲。我覺得城城（郭富城）講得啱，個櫃桶係屬於人哋，點可以將自己嘅嘢亂咁放入人哋個櫃桶度呢？而且黑客又鍾意挑戰成功感。」

祖兒：我冇慾照

祖兒透露自己的相片會用外置hard disk備份，最近壞了找專人回家修理：「冇慾照，唔會有令大家嘔嘅相，我唔興玩呢啲，呢啲小不點有乜好睇，呢啲情趣唔係我杯茶。」
此外，昨有內地網聲稱加拿大天后Avril Lavigne裸照遭曝光，但其實是移花接木的相片；另美劇《紐約叻女》（Girls）女星Lena Dunham在twitter呼籲：「請大家支持受害女星，不要看這些相片，記得當你看這些相的同時，其實是再一次侵犯她們，這樣做不正確，千萬記得偷相者不是黑客，是性犯罪者。」
採訪：王連連
攝影：仇志德