當年今日
關於我們

母親節孤伶伶 卓林唔同吳綺莉食飯

蘋果日報 2015/05/10 06:00

蘋果吳綺莉母親節即時卓琳

吳綺莉自從涉虐女被捕後,佢同女兒卓林嘅關係一度成為焦點,喺呢段母女關係仲未變差之前,每年嘅母親節都係一齊過,不過今年情況就仲未清楚。

喺噚日下午一點左右,吳綺莉就一個人喺屋企出發,去到一間茶餐廳食飯,佢入到餐廳之後,就坐咗喺一個角落對住牆食嘢,似乎就唔想見到人,其實可能天氣太熱嘅關係,所以佢就叫侍應拎把風扇畀佢,都唔願意離開角落。食完之後就去咗大埔一個商場,喺4點半左右就番咗屋企,到咗7點半就一個人出咗去食飯,同樣都係坐喺角落,食到9點左右就返咗屋企。

而喺今日,吳綺莉就著番同一件衫,喺1點左右去咗士多買嘢,再去番噚日嗰間茶餐廳食飯,其間佢發現記者,即時戴上口罩,問到佢今晚會唔會同卓林食飯,佢就話唔會。之後佢入咗餐廳,同樣都係坐喺角落。返到屋企嘅時候,問到卓林有冇同佢講母親節快樂,佢就話:「你哋同我講囉,好冇?」之後再問到同卓林有關嘅問題,佢都只係揮揮手,冇答到問題。

到咗下午三點左右,吳綺莉就換咗衫,再揸車出去,再問到佢係咪真係唔同卓林食飯,佢就話:「係呀,今晚要做嘢。」其後有兩個和尚上咗佢車,之後就離開咗。