LME年會嚟到第七屆，今晚連開150幾台，雲集1,900人，晚會特色係要求大家著得靚靚，主人家港交所（388）行政總裁李小加上台時候話，見到各位同事都打扮得靚靚出席，特別係女同事都盛裝，不過呢，佢就觀察到男士們有少少hea，部分人著普通西裝當係dress code嘅燕尾服，佢鼓勵大家，金屬期貨行業每年有2次年會，應該趁機「偶爾做個紳士」，講笑咁話自己套衫都係一年著兩次昨。今年秉承過往傳統，送上袖口鈕兩粒。

由朝早嘅論壇踩到夜晚嘅晚會，小加今日都有少少疲態，不過佢之前透露，一年只係會喺暑假時放一至兩個禮拜假，講笑話都仲要做「柴可夫」車屋企人去旅行，似乎真係全年無休。

舊年新任主席查史美倫查太，喺LME年會著咗件靚靚花旗袍，今晚就變低調黑色中袖喇。今次晚會主題係火車，似乎係要快速到達咁解，好符合港交所近年推嘅Connect政策。