當年今日

  北角殯儀館猛人雲集 - 李八方

蘋果日報 2002/02/09 00:00


前晚田少母親葬禮八方已經報過一次料,話猛人雲集。昨日上午十一時大殮,來送田老太最後一程的來賓級數更上層樓,可以說是掌握香港政商命脈的人都擠滿北角殯儀館方寸之地,包括阿董夫婦、李超人三父子、煲呔曾、阿松、陳太等;而官員則有曾蔭培、周德熙、林煥光、吳榮奎;商界就有董建成、吳光正、郭炳聯,劉皇發、鍾士元同陳永棋等。
田少的自由黨黨友都算唔話得,周梁、張宇人同楊孝華由頭到尾幫手打點一切、招呼來賓。煲呔曾和馮國經一早就到場,坐足全程成個幾鐘;阿董就只待了十分鐘就急急腳走;超人雖然遲了十分鐘,但亦好畀面留到完場;小超人李澤鉅更是八點半就到場;不過論誠心,都要算是小小超李澤楷同楊啟彥,佢哋天寒地凍一連兩日都出現,早到遲走畀足面。
田老太大殮儀式十二點完成之後,超人同煲呔曾一邊出門一邊雞啄唔斷,而田少兩兄弟同家人則走咗入隔籬的海逸酒店,可能就在那兒搞掂餐解穢酒。
最有趣的要算是煲呔曾,佢原來好守傳統,八方見佢一上車就急不及待拆吉儀、食吉儀內的糖果(原來吉儀中有一個十元硬幣和一粒瑞士糖)。
有份出席的鍾士元同八方講到田少兩兄弟近來的表現,話:「Michael(田北辰)幾好吖!」同阿哥各有各好,重話「Michael都係一個從政人才」。
不過陳太就唔多好彩,同夫婿陳棣榮手拖手到殯儀館時,就被擺放在街外的花牌絆了一下,表情痛楚地揉了好一會小腿才舒服點。


E-mail:[email protected]