四十一歲的阿英,八九年首次發現小腸內生有腫瘤,醫生替阿英進行切除手術後,她亦如常工作;直至九九年,她感到右腹劇痛,入院詳細檢查,方發現肝臟有五個大小不一的腫瘤,雖已立即施手術,但半年後又復發,而且癌細胞沿淋巴腺擴散,去年尾開始,阿英身上更長出了兩個如拳頭般大的腫瘤,令她寢食難安。
曾接受善終服務
「嗰兩個瘤一個生喺左邊腰,一個生喺右邊乳房對下,短短幾個月,睇住佢哋由半隻手指尾咁大,一直脹大到好似一個拳頭咁,令我瞓覺都轉唔到身,好辛苦。」阿英憶述。
由於阿英的情況十分嚴重,院方一度轉介她接受善終服務,及至今年九月中,醫生建議她服用一種抗癌新藥Glivec,病情才有了轉機。
服藥後腫瘤消失
「我由最初完全落唔到床到𠵱家可以自己落街買餸,胃口亦好番好多,最奇迹係兩個瘤𠵱家已經完全消失咗。」阿英邊說邊翻起上衣給記者看,憑肉眼所見,的確看不到她身上有任何腫瘤。
臨床腫瘤科醫生徐成之對於Glivec亦給予正面評價,他表示:「GIST係一種好罕見嘅癌症,全港每年新增病例少於十個,目前嚟講,Glivec可以話係呢種病嘅唯一解藥,一般病人食兩個星期已經會有明顯嘅反應,而呢隻藥嘅好處係只會狙擊癌細胞,唔似傳統化療、電療,會傷及正常嘅細胞。」
Glivec是由美國藥廠研製的抗癌藥,面世只有兩、三年,主要適用於慢性骨髓性白血病及胃腸道基質腫瘤,有統計指出,Glivec對這兩種癌病的治療成效分別有百分之五十和百分之八十。