陳柏宇(Jason)一連三場演唱會喺九展結束，估唔到男兒有淚不輕彈，Jason慶祝自己入行十年演唱會，除咗女友符曉薇，仲有黃偉文、林奕匡同女友、周志康同太太來捧場，嘉賓請來偶像許志安。

安仔出場，同Jason合唱《一步一生》，搞到佢眼濕濕：「我湧住想喊，18、19歲參加歌唱比賽，表格有欄要填歌唱願望，我寫上想同許志安合唱。」安仔即刻熊抱Jason話：「你值得嘅，入行十年有咁多人支持，你要唱多啲歌，行更多個十年，唔好喊，我先走。 」Jason仲話之前睇安仔演唱會都喊，女友問，佢話唔捨得個騷完，會唔會太感性？

之後唱到《沒有你，我甚麼都不是》，Jason感激台前幕後同粉絲支持，又喊！仲喊到要唞大氣先可以再唱，然後自爆有人叫佢過檔：「有啲人覺得我公司做唔夠好，但係我覺得唔係，好多人盡力幫我，我都同班同事一齊做野好開心，我覺得關係重要過物質，所以我唔會轉公司。」最後係三度encore完場。