已半退休、年屆六旬的林先生，雖然經濟能力有限，仍本着「幫到人就幫」的心態對待弱勢社群。他多年來已多次購買新電器捐予本報曾報道的個案，尤其是長者。他坦言：「我都唔記得捐咗幾多部電器出去，我次次都買新嘅。」
他說買新電器較有保證，「捐舊電器，可能好快會壞，唔用得，又冇保養。」
他說，親自到電器店選購電器也有一套心得，「最緊要啲掣簡單易用，如果唔係送咗畀佢都唔識用」。
黃婆婆對於有善長瞬間為她達成其心願，感到高興，黃婆婆難以置信地說：「我老公話估唔到咁快有人捐部洗衣機畀我，仲要係新嘅，真係好感激嗰位善長！」
她指着機身的感應掣歡喜地說：「全部有晒中文字，啲掣好簡單，安裝師傅都教得好清楚，好明白。」她隨即拿起衣服向記者示範如何使用洗衣機，有如小童獲贈玩具一樣開心。