郭晉安演《致命復活》亦正亦邪嘅「韋逸昇」，睇到啲觀眾好肉緊，想知邊個係big boss!?搞到安仔被困深山成十年，套劇仲要講食毒蛇同青蛙，返到嚟香港，老婆仲嫁埋畀好友，又要搵當年綁架案嘅真相，精神支柱崩倒，仲患創傷後遺症。齋睇劇情已經夠晒激，何況係要揣摩個角色嘅安仔!

今日有周刊指，今年有望第四次拎視帝嘅安仔，原來犧牲幾大，拍《致》嗰陣一度患抑鬱，難抽離個角色，又要成日食安眠藥先瞓到，要長期自閉喺間房，冇咩同老婆歐倩怡及仔女接觸，冷戰半年，一返屋企就瞓，一係匿埋喺房，拍劇5個月，放得5日假，佢同啲仔女接觸少咗，有時仲目光呆滯、有時目露凶光，令歐倩怡有話過老公，安仔亦成個人瘦晒，

周刊問過倩怡，佢就話嗰時都唔敢打擾老公，知個角色唔係善男信女，自己一個搞好晒屋企嘢，唔使老公擔心，又話老公今次比以前付出更多體力同心力，佢仲話安仔要拍完先「回魂」，安仔拍完亦覺得自己有唔妥，決定停工休息，話以後要慎重去揀劇本。

安仔都想補償太太，歐倩怡兩年前考到船牌，安仔應承出年買小型遊艇畀太太，又准太太學揸飛機，去澳洲考正式牌照。