頂波太多勁頭痛 奇雲杜里頂唔順要退休
頭槌退休奇雲杜里MLS美國職業聯賽科羅拉多急流
英國《BBC》報道,愛爾蘭前鋒奇雲杜里因為職業生涯頂波太多,導致依家經常不停頭痛,喺無可奈何嘅情況下決定退休,結束球員生涯。
現年34歲嘅奇雲杜里家陣效力美國職業聯賽(MLS)球隊科羅拉多急流,奇雲杜里話希望避免呢啲經常頭痛嘅徵狀變得越嚟越嚴重,甚至係帶嚟永久嘅傷害,所以喺聽取醫學意見後,今季都唔會再踢波,亦即係話退休嘅決定係即時生效。奇雲杜里喺15年球員生涯入面曾經多次受到腦震盪,單係今季已經有兩次,佢話:「今年就算跳起頂波對我嚟講都好困難,仲令到我經常頭痛,今年嘅兩次腦震盪,加埋咁多年嚟嘅情況,令我開始擔心。」
奇雲杜里職業生涯效力過雷丁、狼隊、昆士柏流浪、水晶宮同埋科羅拉多急流,喺各項賽事上陣437場,取得109個入波。佢亦都幫愛爾蘭踢過63場,有14個國際賽入波。