去年5月已煞青、由周迅霍建華主演嘅宮鬥劇《如懿傳》，今日傳來消息——終於可以喺化今年8月14日、東方衛視晚間10點獨家播出，一周播八集。周迅以約1.16億港元「天價」接拍此劇，播出有期，希望回本喇。

大陸微博「娛樂紅人館」昨日披露獨家消息稱，東方衛視獨家拎到《如懿傳》衛視播映權；至於江蘇衛視，因為之前已經收咗錢、晚上十點一定要播簽咗約嘅節目，所以惟有放棄《如懿傳》衛視播映權。但至今《如懿傳》官方微博同東方衛視都未有證實消息。周迅晚上更新微博時，亦未有提及。

「娛樂紅人館」消息稱，《如懿傳》播法係周一至周四，每日播兩集，故一周合共播八集。按此標準，即最快亦需要11個星期先至播完。消息亦稱，《如懿傳》雖然逃出生天，但將由99集，縮減成88集。

不過，傳聞有另一個版本，就係指《如懿傳》將於7月啟播，為周播劇形式，刪至66集。至於邊個傳聞先至屬實，就有待官方公佈。

《如懿傳》係《甄嬛傳》系列，有指因為涉及過多宮鬥，與主旋律不合，故傳出「已經斃了」，但「國家廣播電視總局」3月30日公布「2017第四季度電視劇發行許可情況」，《如懿傳》事實上已經獲得發行許可，所以依家傳出上映有期，亦不足為奇。

至於范冰冰主演嘅《巴清傳奇》（前名《贏天下》／《巴清傳》），命途多舛，又大幅刪剪又改劇名，結果就爆出男主角高雲翔涉性侵案。早有傳劇組已將高雲翔除名，由范冰冰男友李晨頂替他補拍戲份，但投資者唐德影視就話冇收到取消高雲翔戲份嘅通知。依家就連范冰冰李晨都身陷崔永元嘅「逃稅風波」，今次真係唔知點收科。