雨僑、廖子妤、李靜儀(Heidi)、楊偲泳(Renci)中午喺尖沙咀海運大廈為化妝品牌宣傳產品，均以一身白色裝束現身。

Heidi剛去完巴黎時裝週回港，分享人生恐怖經歷，喺當地坐的士，司機見路上有人阻街，落車相勸下，同對方打鬥起嚟，自己睇到呆咗，覺得呢個場面驚過被打劫，結果司機留住血車佢地去目的地。

至於，幸福嘅準新娘雨僑，喺今個月31號就喺淺水灣舉行婚禮，筵開十八席，正式拉埋天窗，現時狀態又攰又開心，今日開始陸續「炸人」派帖，包括兩邊公司老闆同同事。雨僑：「我哋之前工作太忙，試過一晚我攞住個電話，瞓到第二日，身體好攰，但精神好開心，o依家進入最後階段。」雨僑同未婚夫羅力威都會工作到婚前幾日先收爐。

雨僑直言近日壓力大，搞到爛嘴角：「我之前好享受入回禮同餅卡過程，有日發現未婚夫竟然入晒啲餅卡，覺得好唔開心，佢為咗氹我，差啲要將啲餅卡同回禮嚟拎番晒出嚟。」雨僑稱暫未有時間去試婚紗同晚裝，造型想以輕便為主，可以走動同大家影相。

雨僑都期待未婚夫「愛的宣言」，會返去提羅力威度一度；羅力威早前專登送咗首歌俾雨僑，同樣期待未婚夫演繹，話羅力威會負責音樂部同康樂部。講到兄弟姊妹團，雨僑話都係圈外朋友，希望圈中人著靚靚開心食飯。