許志安、蔚雨芯、裕美、蔡潔今日喺九展出席兒童慈善嘉年華，對於劉德華噚晚因喉嚨發炎而要中途腰斬個唱，今日再決定取消今、明兩場（新聞連結： https://bit.ly/2CDTR7b ），安仔話：「我好心痛，希望佢快啲好番，唱14場已經好叻，佢個心愛錫歌迷先落呢個決定，我有新加坡朋友今晚睇，不過鍾意華仔都會明白。」

講到老婆鄭秀文當年開演唱會期間試過失聲，安仔表示：「好心痛，擔心，但呢啲控制唔到。」提到安仔明年8月或9月開個唱，佢指如轉天氣就要小心啲，好好保養氣管，鍛煉體能，抵抗力好就唔會頂得住。談到鄭秀文大讚安仔好fit，安仔笑住話：「唔係，我哋一齊跑，佢fit啲！」

對於有報道指蔚雨芯隨時嫁馬來西亞富二代做千億新抱，佢否認此事，強調同對方只係好朋友關係，喺馬來西亞做騷時認識。問到係咪對方追佢？蔚雨芯話：「我唔知，順其自然，我有好多朋友追，唔係揀緊，只係我o依家工作行先，2019年有好多目標，將戀愛同結婚放埋一邊。」有指佢比以前富貴咗好多，蔚雨芯表示：「我努力工作，處理屋企人嘅小生意。」追問佢現時係咪單身？佢只係話：「係好朋友，如果有一日我結婚，想有自己嘅家庭，我會同大家講。」

精選娛聞，喺晒《娛果》
http://fb.com/appledailyent