當年今日

標緻807 極速登場成焦點

蘋果日報 2002/02/27 00:00


憑206及307車系而大收旺場嘅標緻車廠,繼於今年年初宣布會推出206SW及307SW旅行車後,最近又正式公布咗有關新款807車系嘅資料,而據聞新車亦有望於今年內抵港㖭。
從廠方所提供嘅相片中可以睇到,全新標緻807嘅造型,與同廠嘅307及607車系相近,同樣採用上低斜嘅頭燈及圓渾嘅外形,一派FamilyLook完全表露無遺;而趟門及低地台設計,亦能讓乘客於上落車時變得方便。另外,807嘅車廂布局亦與其他MPV車一樣,同樣來得靈活多變,車內座椅可按閣下喜好而收摺放平,以增加尾廂嘅載物空間;而一雙前排座椅更可作180度調轉,配合中排座椅收摺,更可形成一個臨時起居室㖭。車內設備亦見齊全,除有高級音響及原廠恒溫冷氣外,更備有三個嘅敞大天窗,從而可給予車上乘客有更多親近大自然嘅機會。
而廠方亦為選擇807嘅用家,提供有多個引擎配搭,當中包括有2.0公升直4(馬力140匹)、2.2公升直4(馬力162匹),同埋3.0公升V6(馬力210匹),加上有多台波箱配搭,因而能迎合不同用家嘅需要。各位有興趣嘅車迷,不妨拭目以待喇。