佢係一個歌手，2013年出道，佢叫做葉寶安，2018年，再出道叫做黎俊彥，除咗改名換姓，佢仲來咗一個大變身，用咗大半年，搣走120磅脂肪，變成6呎高，160磅。

黎俊彥嘅減肥經歷，佢想與眾同享，其實佢最想講，係大家要及早注意健康，因為減肥都有好多後遺症，佢話：「好似大肚婆生仔，由大肚腩變細，有後遺症，嗰時太肥，手踭都有橙皮紋，我問過教練一個波，放氣，都係會皺咗，純粹只係可以build up番啲肌肉，等個型好睇番，但係啲紋仲係會有少少，手收番好多，係個肚最難減，嗰時啲人咪話，要搽啲膏，依家已經冇，嘗試下收正好啲。」

當年嘅肥仔，難免受人人歧視，佢話：「嗰時啲人成日有人問我幾時生得，話都跟左十幾年，我試過有一次貪得意，想係一個柱中間攝入去，我攝唔到，頂住，點知俾個女仔見到，佢陰陰嘴笑我，好低能，嗰時我係小學，做小學雞嘢。」

呢個轉變，黎俊彥係有期望：「我希望以一個正面，將來嘅歌，係一啲正面嘅歌，我依家同可嵐嘅歌，係一首好正面嘅歌，講癌症，以一個正面勵志形象出來，香港缺乏呢啲嘅歌，想做一個正面嘅歌手。」

另一方面，佢仲想以自身經歷，話俾大家知，健康嘅重要：「我希望自己長命，嗰時身體唔好，成日頭暈，好多嘢做唔到，好多人覺得我好hea，但係其實我唔想，我係冇心情去做，驚自己唔知幾時暈低，好多嘢有心冇力，依家有個健康身體，做嘢落力啲，有心機去做，去做好多喜歡做嘅嘢，就算行山都要健康嘅身體，去旅行又係，冇健康咩都做唔到，呢番說話我同好多同年紀或者細過我嘅人講，佢哋都當我係耳邊風，話我好似阿伯，老土，咁快講養生，又早瞓，你揀寧願滿足口感，定係冇健康身體嘅人生，心臟、糖尿病未來搵你，呢啲已經係年輕化，佢哋會話人生冇意義，話我黐線。」

採訪：楊潔雯、張家倫
攝影：陳俊強
攝錄：廖達燊
場地：FAC Sportagon
服裝：Dusty

精選娛聞，喺晒《娛果》
http://fb.com/appledailyent