哥本哈根環保地標｜多功能垃圾發電廠變人造山 集滑雪健行攀石場於一身
蘋果日報 2020/09/30 00:03
丹麥哥本哈根
在煙囪下滑雪呢個經驗，世上唯一。
全球最高戶外攀石牆，900米長草地滑雪場，被譽為全球最乾淨的垃圾發電廠
北歐人有幾注重環保、幾識設計，唔使多講。丹麥哥本哈根去年年尾開幕的 CopenHill，唔止用垃圾發電，仲係一個多功能複合式建築。
CopenHill由丹麥建築師Bjarke Ingels設計，離市中心只有10分鐘車程，高124米的「人工山頭」建築，被譽為丹麥最巨型建築，集滑雪、攀石、健行、餐飲於一身。最新啟用的設施，是剛於上月正啟式用的攀石牆。戶外攀石牆高85米闊10米，堪稱全球最高。睇落幾乎垂直成90°的攀石牆，分了4個級數同斜度，設計每20米轉1次斜度，越底層難度越低，新手都可試玩。
CopenHill健行步道RUN365，最短的步道為450米，邊行邊可高高在上睇到哥本哈根靚景。
哥本哈根CopenHill攀石牆去年已完工，延遲至今年秋季先正式開幕。
CopenHill另一個有趣設施是草地滑雪場SKI365。貴為雪量十足的北歐國家，點解要有人工雪場？皆因哥本哈根海拔只有91米高，即使落雪，都冇適合的地形畀國民滑雪，最近要去到瑞典，SKI365可謂丹麥人的福音。雪道長900米，可從85米高一滑而下至「山腳」。圍住雪場周邊仲有健行步道RUN365，周圍種了近2,000棵灌木，中間的草地位置亦可野餐。
哥本哈根CopenHill草地滑雪場SKI365全年開放，可玩ski或snowboard，亦有滑雪教學。
功能多多的CopenHill，銀灰色外形討好不在話下，早在3年前已完成發電廠部份，更設內部參觀。地球每日產生的垃圾可填滿一座金字塔，因此CopenHill嘗試燃燒垃圾以取代化石燃料，是廢物利用的極致。建築內部有廢物處理器、蒸汽機、渦輪機等設備，每年可將40萬噸廢物轉化為清潔能源，並為16萬家庭提供電力。丹麥在2018年已計劃將哥本哈根變為全球首個零碳首都，CopenHill發電廠咁成功，零碳首都指日可待。
哥本哈根CopenHill被譽為全球最乾淨的垃圾發電廠。
撰文：賴洋洋
編輯：吳允、鄒仲安
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！