【李八方online】林鄭放假去邊度?唔話你知住 拜拜你條尾
林鄭月娥聖誕節放假
打工仔朝思夢想嘅唔係退休就係放假。嗱,好似特首林鄭月娥咁,聽日開始放假放到28號,放假都唔緊要,佢仲專登拍條片上網同大家講我放假啦,但係去邊呢又唔講住,會唔會招積得滯呀?
娥特喺fb出片同大家講,仲有幾日就聖誕節,所以預祝大家聖誕快樂、新年身體健康、家庭幸福快樂。實情咁樣喺內地已經犯禁,事關聖誕節呢啲西方產物係唔可以慶祝嘅。
跟住娥特仲話舊年放聖誕假,佢去咗深圳北坐高鐵去桂林幾日,今年就唔使,因為有咗西九站嘛。叻啦叻啦,知你過咗條「割地兩檢」喇。至於佢聽日開始嘅聖誕假又會去邊呢?佢話今年唔去桂林,大家想知就記得留意佢fb喎。老老實實,除非娥特趁假期飛走去美國講數,或者去搵同樣放緊假嘅律政司司長鄭若驊,否則八方嘅興趣都唔大囉。
林鄭月娥聽日開始放假放到28號,仲專登拍條片上網同大家講我放假啦,但係去邊呢又唔講住喎。林鄭月娥fb圖片