由韓國殿堂級影帝宋康昊夥拍擅演小人物角色嘅劉海鎮，以及韓劇《回答吧！1988》男星柳俊烈，聯同外援湯瑪士基斯曼（Thomas Kretschmann）主演嘅韓國賣座《逆權司機》，下周四殺到嚟香港，電影上月喺韓國開畫後屢創紀錄，上映19日累計觀影人次已破千萬，現時累計更逾1,200萬人次，打入韓國歷年最高票房頭十名，同時電影有望代表韓國出戰第90屆奧斯卡最佳外語片。

《逆權司機》打正名號係真人真事改編，背景係1980年5月18日嘅前後，描述當時的「光州民主化運動」(又稱光州事件、光州事變或五一八光州事件)，光州學生反抗軍事獨裁進行學生運動，總統全斗煥下令武力鎮壓，又實施戒嚴，禁止車輛於戒嚴期間進出光州，同時更進行新聞封鎖，令光州以外的國民無法得知真相。

現任總統文在寅觀賞完韓片《逆權司機》後話：「當年民運的真相尚未被完全揭露」，感受相當深，至於港人睇《逆權司機》時，單睇內容簡介已覺似層相識，特別係80年代前出世的港人，觀賞《逆權司機》時感受更特別深刻，武力鎮壓、學生運動、新聞封鎖等等，無不如「六四」一樣，看着螢光幕上催淚彈嘅煙霧，又如再次目睹2014年「雨傘運動」時嘅景況，感覺既熟悉又心痛。

電影中宋康昊飾演首爾的士司機，因老婆病逝而獨自照顧女兒，身兼母職嘅宋康昊一直努力賺錢還債，但卻仍欠包租婆房租，當佢偷聽司機之間對話時，得知一名外國乘客願意豪花10萬韓圜（約690港元）乘車由首爾來回光州時，佢冇問詳情即搶咗這單生意，卻令佢嘅人生有重大改變。

宋康昊喺片中活演這個小人物的士司機，當佢第一次見到湯瑪士基斯曼飾演嘅德國記者時，以笨拙嘅英文與對方交談，佢並唔知道湯瑪士基斯曼到光州嘅目的，當佢成功協助湯瑪士基斯曼抵達光州後，宋康昊睇到滿目瘡痍嘅光州，睇到湯瑪士基斯曼不斷拍攝周圍狀況，宋康昊終於了解到湯瑪士基斯曼此行目的，走還是不走？起初宋康昊唔願意離開光州係因為仍未收到酬勞，加上被光州嘅士司機們嘲諷，令宋康昊不情願地留在當地。

眼看光州的士司機們為咗救援被鎮壓嘅平民同學生，宋康昊仍然只求自保，但光州情況卻越來越嚴峻，湯瑪士基斯曼此行目的被軍人得知，全城搜索湯瑪士基斯曼以及接載佢到來嘅首爾的士司機，這時宋康昊有一次離開光州機會，佢成功抄小路離開，但得知光州以外嘅民眾對發生喺當地嘅一切完全一無所知時，宋康昊決定要讓世人了解真相，更義無反顧再次回到光州，誓要協助湯瑪士基斯曼逃離，將軍政府鎮壓真相公開。

每條民主自由嘅路上總會有所犧牲，光州事件每步都充滿鮮血，當中飾演熱血學生嘅柳俊烈、劉海鎮為首嘅光州的士司機們，佢哋為咗民主之路出了一分力，宋康昊同湯瑪士基斯曼亦靠佢哋才得以逃離，將這段殘酷嘅歷史曝光。