曾拍劇集《OnCall36小時》、《點金勝手》嘅無綫奀星馬貫東，噚晚被讀者黎小姐透過「爆相爆片」發現佢孖樂壇新人陳詩欣夜遊中環AIA嘉年華，當時兩人喺度玩擲公仔攤位遊戲，手上各有一隻公仔戰利品，最後一擲空手而回。

馬貫東喺2000年開始拍過多部無綫劇集，但大部份都係扮演閒角，有啲甚至連角色名字都冇，包括《尋秦記》同《妙手仁心2》，喺無綫捱咗好多年嘅佢，做過嫖客、侍應、經紀、惡警、村民、記者、打手、搬貨員，執達吏、衙差......等角色，學星爺話齋「茄喱啡都係演員嚟」，馬貫東因為熟口熟面結果被讀者一眼認出。

3年前佢喺微博留言：「21歲時甚麼也不懂，只知道只要我努力就總會有出人頭地的一天，7年後的今天，我也沒有改變我的想法！」

今日記者致電陳詩欣，問佢係咪同馬貫東拍拖？陳詩欣例牌否認：「其實仲有其他人，只不過佢哋去玩過山車，我唔敢玩，去玩攤位遊戲，我哋識咗6年，未入行前做model拍廣告識。」問對方是否追求她？陳詩欣說：「唔係囉，我都想有男仔追，但冇人追，自己覺得事業重要，佢追我先算啦，我鍾意成熟穩重孝順嘅男仔。」