韓國男神金秀賢主演嘅新片《Real》定檔於本月28號喺韓國上映，早前金秀賢就孖住成東日及Sulli為新片宣傳，今日片商就公開咗長達4分鐘嘅製作片。

片段中有金秀賢、Sulli、成東日等主演嘅訪問之餘，更有一眾主演嘅拍攝花絮。金秀賢提到片中一人分飾兩角時，表示表現出兩種唔同嘅面貌係一次新挑戰，拍攝時都好有趣。雖然金秀賢依家先29歲，同片中其他資深演員如成東日、李聖旻等人相比演戲經驗較少，但金秀賢嘅成熟演技獲得前輩激讚。

而金秀賢喺片中有唔少動作戲，不過金秀賢都親身上陣拍攝，就連武術指導都讚金秀賢能夠完美消化動作場面，對金秀賢好高評價。至於片中惟一女主演Sulli亦指為《Real》特地去上堂，花咗好多心機學習，而花絮中可見金秀賢都對Sulli照顧有加。