人稱「邦民女」嘅陳嘉寶(Anjaylia)有份主演嘅新戲《沒女神探》就嚟上演，佢又要忙於為新片宣傳，不過佢同闊少男友黃頌祈(Epaphras)一向都孖公仔，幾忙都會見面。

有讀者透過爆相爆片提供咗一張相，話Anjaylia同男朋友今個星期一同兩位女長輩去咗長洲嘆海鮮，似乎係見家長，Anjaylia透過經理人回覆，承認星期一同男朋友去咗長洲玩，同行嘅係Anjaylia媽咪同舅母，經理人話：「Anjay個舅母喺美國返咗嚟，所以同咗佢哋去長洲行下食海鮮。梗係唔係見家長啦，佢(Epaphras)一早識晒啦。」經理人話此行佢哋除咗食海鮮之外，都有試下地道長洲美食，仲去咗行張保仔洞同天后廟，行程都好充實。