由河智苑及姜敏赫主演嘅MBC劇集《醫療船》噚日播出大結局，劇集由開播一直穩坐收視冠軍，不過之後因為劇情老土兼拖拖拉拉，令到劇集收視跌咗唔少，最終唔及由秀智、李鍾碩主演嘅SBS《當你沉睡時》。

而噚晚大結局嘅《醫療船》就講到河智苑忽然患癌，將昔日老土韓劇情節再搬上公仔箱，最後劇情自然話河智苑唔想連累愛人姜敏赫，點知姜敏赫就自己發現，之後就決定同女友一齊面對，努力抗癌魔，最終大團圓結局，幸福美滿。由於劇情實在太老土，所以唔少網民都留言狂鬧，話劇情好夾硬，覺得編劇應負上責任。

由於劇情太老土關係，令到噚晚《醫療船》結局收視不升反跌，由前日嘅7.2%同9%，跌至噚晚播出嘅第39集同40集嘅收視為7.2%同8.6%，至於同檔嘅《當你沉睡時》噚晚播出第23及24集，收視就升咗，分別錄得7.3%及8.6%，而KBS嘅《瘋狗》就有5.6%收視。

另外，由俞承豪同蔡秀彬主演嘅《不是機器人啊》下周將會接檔《醫療船》播出，不過由於MBC工會仍然進行罷工，所以未知會否令到新劇延遲播出日期。

更多娛聞，喺晒《娛果》
http://fb.com/appledailyent