近日一段神秘廣告，惹起網民唔少嘅疑惑，更引申出唔少陰謀論嘅睇法。一段約5秒嘅廣告，以劉德華嘅《真我的風采》作背景音樂，喺廣告中以放煙花畫面襯底，黃色大字寫住「蘋果廣告製作公司」，相信唔少人都見過。而經過《蘋果》查「蘋果」後發現，該廣告與十五年前類似「蘋果電影」廣告均出自同一人手筆。（新聞連結： http://bit.ly/2EVy7WY ）

十五年前，即2003年，當年電視上曾出現過呢個廣告，隨即香港發生惡名昭彰嘅「沙士」事件，而咁啱廣告用上劉德華嘅《真我的風采》，隨即劉德華因病取消演唱會，真係咁邪？不過要講邪，當然唔少得我哋嘅特首林鄭月娥邀請咗華仔為團結香港基金影片《讓下一代看見》做旁白，喺長達3分半鐘影片當中，表示「東大嶼嘅大規模人工島方案，睇來係比較可取」，當時引來坊間不少迴響，林鄭當時就網上輿論回應：「對於劉生先能夠勇於表達佢嘅意見，係表示敬佩，亦都預祝佢嚟緊12月嘅演唱會成功。」

特首都預祝成功，結果華仔因為喉嚨發炎而要取消三場演唱會，意外嘅嘢真係話唔埋，特首都冇面畀。之不過到底係咁啱得咁橋？定係真係有不可告人嘅陰謀？惟有繼續食花生等落去至知。

精選娛聞，喺晒《娛果》
http://fb.com/appledailyent