朱玲玲前晚在尖沙嘴出席「慧妍雅集」活動，雖然已經年屆60歲，但朱玲玲穿上露肩黑蕾絲晚裝，風采依然，不愧有「最美麗港姐」之稱，同場還有已升格闊太的歷屆港姐包括王愛倫、翁嘉穗等。朱玲玲早前再度榮升祖母，兒子霍啟剛與媳婦郭晶晶添了第三胎，生了BB女，朱玲玲開心說：「係呀，多謝大家，係第三個孫女喇，𠵱家有一個孫仔、兩個孫女。」

問到近日是否忙於湊孫，朱玲玲說：「自己都OK啦，反而晶晶就會忙啲，始終要湊小朋友。」孫女似啟剛還是晶晶？她說：「似家姐（霍中妍），全部都似晶晶多啲，可能晶晶啲genes（基因）強壯啲。」提到兩個孫女都似媽媽靚女，朱玲玲又身為1977年度香港小姐冠軍，將來可會讓孫女參選港姐，朱玲玲笑說：「𠵱家太細個喇，唔知佢第二時個樣生成點，唔諗咁多喇。」

朱玲玲指今胎沒有特別獎勵郭晶晶，各有各忙，下周母親節也不會特別慶祝，她說：「反而前排5月1號，大孫仔（霍中曦）學校有個小提琴比賽，大家一齊去睇佢表演。孫仔前一晚緊張到瞓唔着，佢要多啲練習，不過始終都係我哋屋企人，睇就睇得最開心囉。」談到有網民提議要褫奪「安心偷食」女主角黃心穎的港姐資格，朱玲玲說：「呢啲嘢我冇留意，同埋我都唔係慧妍雅集嘅會員，個后冠係由無綫頒畀佢嘅，應該由無綫去決定。」

翁嘉穗透露母親節舉家到峇里旅行，她說：「因為大仔喺外地讀書，最近返咗香港，所以決定舉家去旅行。」峇里充滿陽光與海灘，會否影泳照在網上分享？她說：「睇吓狀態啦，其實咁多年都有keep住身形，又有跳舞同做瑜伽。」至於三歲細仔即將會返學，她說：「都唔會有太大期望，總之由得佢自然發展，唔會逼佢。不過細仔鍾意畫畫同學英文，比較靜態一啲，但都係佢自己喜歡嘅。」
採訪：曹家誠
攝影：仇志德

更多精采時尚內容，盡在 http://add.appledaily.com。