【李八方online】慶祝結婚周年都甩底 區諾軒使唔使跪玻璃?
補選區諾軒李八方
區諾軒送咗份甜蜜蜜禮物畀老婆,補祝結婚兩周年紀念。區諾軒提供相片
立法會3.11補選下周日舉行,各方候選人近日都「夜以繼日,日以繼夜」爭取選民支持,好似港島區代表民主派參選嘅區諾軒就因為忙於選舉工程,搞到棉婚(即係結婚兩周年)紀念日都被迫延遲多日先慶祝,好在區太大人有大量,唔係區諾軒跪玻璃都唔掂呀!
紀念日對唔少女人嚟講好重要,本周一結婚兩周年紀念嘅區諾軒亦深明呢個道理,專登請咗一日假打算同太太食飯慶祝,但世事往往唔可以盡如人意,星期一區諾軒因為臨時有事,甩咗老婆底,延至噚日先可以慶祝。佢話好在老婆體諒佢選舉忙碌,都無詐型,透露送咗盒綿花俾區太,至於有咩喻意?佢只透露同玉桂狗有關,詳情則係兩個人之間嘅秘密!
老婆對於佢參選,有冇唔高興?區諾軒話知道自己會少咗時間陪老婆,所以會更加用心思o氹佢,唔知區太收唔收貨?
立會補選新聞,《蘋果》一網睇晒
https://hk.feature.appledaily.com/legco2018/