34歲日本男星成宮寬貴，上周被雜誌《FRIDAY》公開疑似吸毒照片，一位自稱係成宮朋友向記者提供11月9日凌晨嘅偷拍照，當時成宮招待兩位朋友到家中作客，直指成宮分別用各種毒品招呼朋友。雖然成宮同所屬事務所一度斥報道內容失實，揚言會採取法律行動，不過成宮昨日忽然發聲明宣佈引退，承認被朋友出賣墮入圈套，透露好想立即在藝能界消失，《FRIDAY》方面亦指尚未收到律師信。

成宮曾喺刑事劇系列《相棒》建立出正氣形象，可是報道出街後破壞其大好星途，成宮正為朝日電視台1月開播新劇《就活家族》擔任配角，扮演前田敦子同事兼男友，據知已拍罷三集戲份，電視台方面決定換人，由渡邊謙兒子渡邊大執二攤頂上。成宮受吸毒疑雲影響發展，當宣佈退出演藝界，其代言廣告立即停播，計算其代言廣告共有四個，估計佢要賠逾1億日圓（約680萬港元）違約金，連帶朝日電視台要重拍《就活家族》，料賠償金額相當龐大。

早於17歲入行嘅成宮，14歲當年承受母親離世打擊，細細個已要照顧比自己細六年嘅胞弟，其工作態度一直獲圈中人激讚，如今鬧出引退以及或要孭上巨債，實在令人擔心。