韓國「大長今」李英愛放完一個悠長假期後，早排已經復出拍戲，於江原道投入新劇《師任堂，theHerstory》嘅拍攝工作，而佢亦爭取曝光機會，最近以一家四口嘅幸福姿態幫雜誌影靚相，畫面超溫馨。

李英愛一家喺楊平郡享受綠色田園生活，愛姐拖住越大越靚女嘅囡囡承彬喺河邊散步，沿途仲要望住愛女露出笑容，明顯有女萬事足。另一張相就見到愛姐老公鄭豪泳踎低幫囝囝承權着衫，之後仲要孭住囝囝，同愛姐母女一齊散步，呼吸新鮮空氣，呢對好爸爸、好媽媽認真抵讚。

此外，愛姐又梳了一個復古髮型影單人相，展示凍齡美女嘅魅力。佢受訪時說：「喺長時間休息之中，以妻子同母親嘅身份去生活，真係好幸福，已經係第四年喺呢度過夏天了。」之後佢更不忘為新劇《師任堂》宣傳，叫大家到時要多多捧場。