噚日網上最紅嘅，可能係身兼華置主席嘅青年事務委員會主席劉鳴煒MW，佢早前接受傳媒人張寶華嘅Goyeah.com訪問，談及年輕人置業問題時，叫後生仔少啲去日本旅行、少啲買手機同減少睇戲，兼夾每月儲錢做首期，為上車做好準備。唔少年輕人聽完大鬧佢「成功需父幹」，離地離到上太空，層樓好似天空之城一樣，掀起一片聲討潮。
訪問當日被問到房屋方面有乜意見畀年輕人時，佢叫年輕人應先裝備自己，搵份月薪唔錯兼固定嘅工，儲定錢做首期，反問青年：「願唔願意犧牲，睇少啲戲、去少啲日本？」佢又話時下青少年會買最新型號電話，上一代就比較慳啲使。

第一城首期要儲44年

其間佢舉例若月入萬五蚊，青年會「儲500蚊定3,000蚊？」佢話儲3,000蚊梗係更易上樓，亦指青少年若認為樓價高企、買唔起樓就唔儲蓄，「呢個態度我覺得唔正確」。張寶華都質疑係咪肯儲錢、減消費就上到車先？MW話：「我唔想誤導人，我意思係你唔做我剛才講嘅事，個樓價跌幾多都冇用。」
八方計過數，以沙田第一城最細單位，建築面積395呎、實用面積284呎為例，本月最新成交價約400萬，以六成按揭計，唔計律師費等雜項，單係首期要160萬，月儲3,000蚊，就要44年先儲到！以廿零歲出嚟打工計，隨時60歲先上到樓，又難怪MW俾人話離地。八方噚日見到長實樓神趙國雄，都有問佢一個月儲3,000蚊，幾時先買到樓？佢只話要睇吓買乜樓啦，叫年輕人唔好一畢業就諗搬出去，自己當年都係同阿媽住，慳好多㗎！
MW噚晚出席江蘇社團總會成立典禮時強調，自己重點係講儲錢：「訪問嗰part帶出嘅重點好簡單：樓價幾高或者幾低都好，都係有儲首期嘅需要，儲首期自然要儲錢，儲錢自然有些錢要擺埋一邊，每個人點儲錢，儲唔儲錢都好，呢個係個人選擇，我講嘅係咁多。」

識睇睇留言

學民黃之鋒：我勸你都係盡快諗清楚，點樣處理今日嘅公關危機，網上輿論嘅嘢，唔係靠人脈就搞得掂……父蔭，靠唔到一世㗎。
《100毛》創辦人林日曦：即係姚明同你講，入樽？其實唔難……趷高咪得囉
Alex Cheung：離地三萬丈
Ec Chan：二世祖唔使儲錢就有大把樓啦 !
Eric Wan：一個月儲三千蚊，過兩代就買到樓喇
Danny Lau：I agree with him actually. You need to be financially disciplined when young to build a better future.
Tony Wong：月儲3千，10年36萬，到時一層3百呎嘅都要九百萬，印花稅都未夠呀太子爺。
Cheng Ben：唔儲錢上唔到樓，啱！但儲錢未必上到樓，都啱！咁即係儲錢唔係上唔上到樓的唯一問題！
資料來源：《蘋果》網頁及facebook

李八方
mailto:[email protected]