何佩瑜（Jeana）喺台灣拍攝嘅新戲《天使曾經來過》喺大前日煞科，點知前日凌晨，佢同10歲大馬小演員盧宣彤（Debbie）坐七人車去高雄遇上交通意外。負責揸車嘅年輕女司機由墾丁去高雄嗰陣，七人車突然失控撼向石壆，車頭同車側撞到凹陷變形，坐喺司機位旁邊嘅Jeana撞親個頭，又撞到眼同鼻，Debbie亦撼親頭同下巴。車禍後立即送院檢查，照X光後見冇乜大礙，佢哋已出院休息。

頭眼鼻紅腫

因為去高雄嘅車程約兩個鐘，Jeana當時喺車上瞓覺，佢噚日話諗起炒車一幕仍然心驚膽跳，佢話：「唔係好知發生乜事，因為太突然，我都係第一次遇上交通意外，如果架車撞向另一邊，係會碌落山，可能上得香俾我，所以不幸之中大幸，真係好好彩！」Jeana話個頭、眼同鼻依然紅腫同好痛。
其實，Jeana大前日拍潛水煞科戲，已多次徘徊鬼門關，佢話：「嗰日我要全程hold住呼吸，閉氣落到水底仲要做戲，自己每次想用盡啲秒數做戲，所以好抆先上水，試過控制時間錯咗差啲窒息，所以每一次上水，望到海面一唞氣就好感動，好似來來回回鬼門關咁，估唔到煞科再有車禍。」
撰文：馮仁昭